Ons het eers gekyk na die Heilige Gees by ons en in ons lewens, en verlede week het ons gesels oor die Waarheid in Handelinge 4 en 5.
Vandag gaan ons na Handelinge 7:44-50 kyk...
Lees Handelinge 7:44-50 saam.
Wat staan vir jou uit in hierdie teks?
As God nie in geboue woon nie, is die vraag dan: "Waar woon God vandag?"
Dit is dan ons fokus van vandag: "Waar is God se huis vandag?"
Baie Christenne vandag dink dat die kerk die "Huis van God" is... Hulle dink dat as jy by die kerk se deure instap, moet jy "prim & propper" wees, want dit is waar God teenwoordig is. Hulle leefstyle wys dit ook baie duidelik dat hulle vertsaan is dat God in die kerk is, maar nie buite die kerk nie. By die kerk is ek 'n Christen, maar buite die kerk kan ek aanjaag en doen wat my hart se begeerte is. Dit is baie verkeerd om so te dink...
Ander sal weer sê dat wanneer dit goed gaan en alles in hulle lewens agter mekaar is dat God goed is en Hy is so teenwoordig in hulle lewens, maar wanneer dit bietjie agteruit gaan dan voel dit asof God ver is. Ons dink God is naby, en dan is Hy weer ver...
Selfs David in die Ou Testament het verstaan en geweet dat God alomteenwoordig is...
Lees Psalm 139:7-12 saam.
Wat staan vir jou uit in Psalm 139:7-12?
Ons gaan na 4 verskillende plekke kyk waar God deur die geskiedenis teenwoordig was en waar Hy nou teenwoordig is...
ADAM & EVA
God het ons geskape om by Hom te wees. Ons sien dit waar Hy vir Adam en Eva geskape het. Hy het die mens geskape in Sy Beeld: Genesis 1:27God het die mens geskep as sy verteenwoordiger, as beeld van God het Hy die mens geskep, man en vrou het Hy hulle geskep.
Die mens is ligaam, siel en gees. Die ligaam laat ons toe om in die fisiese wêreld te leef, die siel laat ons toe om die emosionele te beleef en te kan besluite maak en planne te maak en dit dan uit te rig, en die Geestelike is wie ons eintlik is. Ons regte identiteit. Dit is hier waar God met ons is en waar ons met Hom is.
Sonde het wel gemaak dat ons dood gaan. Adam het nog in sy liggaam en siel bestaan en geleef, maar sy gees was dadelik dood toe hy sonde gepleeg het teen God. God het nie meer saam met Adam en Eva gestap nie. God is heilig en Hy is nie waar sonde is nie. Adam was soos 'n boom wat uit die grond uit geruk is (die teenwoordigheid van God) en hy het vir 'n tydjie lewindig gelyk, maar hy was eintlik reeds dood. Sy liggaam en siel het 'n tydjie na sy geestelike dood ook gesterf.
God het nie meer saam met die mens gestap nie, maar Hy het hulle ook nie heeltemal net verlaat en alleen gelos nie..
Ons sien baie hoe God in die Ou Testament met sekere mense praat en vir hulle opdragte gee. Ons sien hoe God deur engele of deur profete steeds leiding gee aan Sy mense.
God het self ook met mense gepraat. In Genesis 6 sien ons dat God met Noag praat en vir hom die opdrag gee om 'n ark te bou.
En waar God vir Abraham roep om uit sy land uit te trek.
En waar God met Moses praat deur die brandende bos.
Die verhale waar God met Sy mense praat is in die Bybel baie. Hy het hulle nie verlaat nie, maar omdat hulle sondig was, was God nie by hulle nie. Al is God alomteenwoordig, het Hy nie vir hulle die voorreg gegee om in Sy teenwoordigheid te wees nie.
Maar God het vir Moses geroep om Sy volk uit Egipte te lei, en om 'n groot tent, die Tabernakel, te bou.
DIE TABERNAKEL
God het vir Moses presiese instruksies gegee hoe om die Tabernakel te bou, en wat om in die Tabernakel te sit, en hoe om dit te wy (te heilig). Moses het presies gedoen wat God hom beveel het om te doen.
Toe hy dit klaar gedoen het, toe eers kom God se teenwoordigheid by die tabernakel in.
Lees Eksodus 40:34 & 35 saam.
Dit is hoe God Sy teenwoordigheid aan die volk van Israel gewys het. Omdat Hy heilig is, kon hulle nie Sy teenwoordligheid beleef nie. Hy was nog altyd en is nog altyd alomteenwoordig, maar die sonde van die mense het veroorsaak dat hulle nie God se teenwoordigheid kon beleef nie.
HULLE WAS ONBEWUS VAN GOD SE TEENWOORDIGHEID.
Maar met die Tabernakel het hulle God se teenwoordigheid laat beleef en laat sien.
DIE TEMPEL
Die volk is die beloofte land in met die Tabernakel, en Dawid vra toe vir God of hy 'n permanente Tabernakel, die Tempel mag bou.
Maar Dawid se seun, Salomo het toe die tempel gebou, met presies die dimensies en die inhoud van die Tabernakel...
Die Tempel het hy in Jerusalem gebou, en vir honderde jaare het mense jaarliks Jerusalem toe gegaan na die Tempel toe, want hulle het verstaan dit is hier waar God teenwoordig is.
Lees Matteus 12:12&13 saam.
Maar, weereens was die volk ongehoorsaam en hulle het die Tempel, wat God se teenwoordigheid verteenwoordig, vol van hulle eie harts begeertes en sondes gevul, en daarom was daardie Tempel ook net tydelik...
Lees Matteus 24:1&2 saam.
In die jaar 70 A.D. was die Tempel finaal afgebreek... Die Tempel was glad nie meer nodig gewees nie. Ons gaan nou sien hoekom nie.
JESUS
Toe Jesus op die aarde was, toe is Hy God se teenwoordigheid tussen die mense. Jesus is God en Jesus was by die mense, so God was by die mense.
Lees Johannes 1:14 saam.
Toe Jesus al ons sondes op Homself gedra het en gesterf het, toe is Hy, soos die Tabernakel en soos die Tempel, vernietig...
Maar, ons weet Hy het die sonde oorwin, en Hy het die dood oorwin, en Hy het weer opgestaan.
En Hy is Hemel toe met Sy hemelvaart.
Die vraag wat ons dan vanoggend vra, is: "As die Tempel af gebreek is en Jesus is nie meer by ons nie, waar is God dan teenwoordig vandag?"
ONS IS GOD SE TABERNAKEL
Toe Jesus gesterf het, toe het die voorhangsel voor die Allerheiligste geskeur, en dit wys dat almal wat in Hom glo nou toegang het tot die Allerheiligste; daar waar God teenwoordig is.
Maar meer as dit, God is nie net teenwoordig daar waar mense die plek gereinig het nie...
Hy is nou teenwoordig in elke gelowige se lewens. Hy is teenwoordig, letterlik in ons liggaam...
Jesus het toe Hy opgegaan het hemel toe gesê dat Hy die Heilige Gees gaan stuur om verewig by ons te wees...
Lees 1 Korintiërs 6:19&20 saam.
Wat staan vir jou uit in hierdie teks gedeelte?
God is teenwoordig by ons elkeen, elke dag van ons lewens. Van die dag af wat ons Hom as ons verlosser aanvaar het.
En ons kan nie besluit wanneer Hy teenwoordig moet wees en wanneer Hy nie teenwoordig moet wees nie... Hy is konstant by ons. In ons goeie oomblikke en in ons swak en slegte oomblikke is Hy teenwoordig...
Lees Kolossense 2:13&14 saam.
Wat staan hier vir jou uit?
Ons is vrygespreek van ons sonde, en God gee vir ons lewe en Hy is teenwoordig in ons lewens..
Hy is natuurlik oral teenwoordig, maar die mense wat in die sondige maniere van die wêreld leef is glad nie bewus van Sy teenwoordigheid nie.
Gesels met mekaar oor wat jy vandag geleer het.
Bid saam.
