Sessies
Hierdie week sluit ons die reeks oor Hebreërs 11 se geloofshelde af en kyk na die minder prominente karakters, soos Barak. Lees hierdie teksgedeelte saam. Dit is opvallend dat sommige karakters sommer net so terloops genoem word. Wat sou al hierdie persone met mekaar in gemeen hê?
Die antwoord lê in Vers 33 en 39-40. Lees dit weer. Wat sien jy raak in hierdie verse? Die helde het verkry wat God beloof het, maar nie vir hulself nie. Hulle was elkeen deel van 'n storie, maar nie hul eie storie nie - hulle was deel van 'n groter storie. Hulle het nie in die pad gestaan van God se storie nie.
Lees die storie van Barak in Rigters 4. Wat staan vir jou uit in sy storie? Wat dink jy was God se plan met Barak en met Deborah? Hoe sluit dit aan by die ander geloofshelde in Hebreers 11?
Barak het nie die eer vir die oorwinning ontvang nie. Ook nie Deborah of Jael nie. Die eer kom altyd vir God toe! Barak het uit die pad gestaan sodat God se plan kon seevier!
Hoe pas jou planne by God se planne in? Staan jy in die pad van God se planne of stap jy die pad saam om Sy plan te laat gebeur?
Deborah en Barak was 'n goeie span. Hoekom dink jy het hierdie span so goed gewerk? Wat was Barak se rol in hierdie spanpoging? Wat was Deborah se rol in hierdie verhouding?
Hoe sluit dit aan by die ander rigters se rol (Gideon, Simson, Jefta)? Die rigters was brugbouers vir 'n spesifieke seisoen en tyd, dit was nooit die bedoeling dat hulle konings moes word en die eer moes ontvang nie. Hulle was net daar om die storie voort te sit.
Wat Barak in die helde-akker van Hebreers 11 laat beland het, is nederigheid, gehoorsaamheid en geloof in God se plan. Hy het uit die pad gestaan. Die plan was nooit oor hom nie en hy het nie die eer gekry nie.
Dit maak nie saak of jy die leier van 'n span is of net die leier van jou huis is nie. Dit maak nie saak of jy siek is of gesond is nie, of jy ryk of arm is nie - God het 'n spesifieke rol en taak vir jou in Sy plan, ook vandag.
Dink 'n bietjie aan die afgelope week. Wat is jou huidige omstandighede? Wat kan God deur jou omstandighede laat gebeur? Watter persone het God hierdie week op jou pad geplaas en wat was elkeen se rol?
Ons veg nie die sigbare nie. Ons stryd is nie teen vlees en bloed nie, maar teen die onsigbare - Satan, hoogmoed, vrees, negatiwiteit, passiwiteit... In plaas daarvan dat ons die sigbare dinge rondom ons baklei, moet ons bid vir hemelse visie - God se geheime wapen om verder as ons onmiddellike planne te kan sien.
Watter eie agenda is daar wat jy vandag opsy moet sit? Watter opinie of standpunt staan in die pad van God se plan? Wat moet jy dalk prysgee of verloor ter wille van die groter prentjie?
BID:
Maak my doel en roeping vir vandag aan my bekend, O Heer!
Help my om verby my eie agenda en opinie te kyk na die groter plan wat U reeds beskik het.
Here, help ons om hande te vat met ons broers en susters in die stryd teen die onsigbare, eerder as om mekaar aan te val vir 'n plekkie in die son.
Dankie Here vir geloof as die geskenk om verder as ons eie storie te kan kyk!
Amen.
Begin jou sessie om saam te bid, stil te wees vir 'n paar oomblikke vir almal wat tans geraak word en geraak is deur die covid pandemie.
Ons is tans besig met ons reeks oor die geloofshelde in Hebreërs 11
Hierdie week fokus ons op Ragab.
Lees weer die volgende teks - wat staan vir jou uit in die definisie?
Lees die volgende teks vers in Hebreërs 11:31 oor Ragab.
Wat staan vir jou uit in die teks gedeelte en die storie van Ragab?
Om die storie van Ragab beter te verstaan moet ons haar storie gaan lees in Josua 2:1-24. Lees die gedeelte saam.
Wat staan vir jou uit in die teks gedeelte en die manier hoe Ragab die spioene gehelp het?
Die effek van haar dade word in die volgende teks gedeeltes in Josua uitgebeeld- lees dit saam.
Wat is die effek van die rooi tou? Die tou wat die spioene gehelp het, maar ook Ragab en haar gesin gered het?
Ons interaksie met die "rooi tou" maak die lewe anders. Die rooi tou is niks anders as ons verhouding met Jesus ons Here, wie se bloed gevloei het sodat ons deel kan wees van die nageslag wat tot in ewigheid saam met God kan leef.
Ragab se keuse om haar leefstyl te verander, om die spioene te help, om in 'n lewende verhouding te leef met die verbonds God van Genesis 15 en Genesis 17:7 behels 'n lewe wat verander het. Die ou lewe is dood en 'n nuwe lewe kom na vore vanuit 'n lewende verhouding met Jesus.
Daar is 'n storie van man wat baie ongekultureerd geleef het en eintlik niks anders as 'n ongeslypte diamant was. Hy het verlief geraak op 'n kosbare vaas in 'n winkel venster. Hy het al sy geld gespaar om die vaas te koop. Toe hy die vaas in sy huis op sy tafel plaas, besef hy dat niks in die huis by die vaas pas nie. Hy het met tyd alles vernader om by die vaas te pas. Die tafel, die mat, die gordyne, sy meubels met tyd het alles in sy huis verander om by die vaas te pas.
Hierdie was 'n proses waar sy hele lewe verander het asook sy fisiese voorkoms.
Dis die storie van Ragab. Wanneer ek en jy besef dat al was ons skarlaken rooi soos die tou - kan die Here ons elkeen verander om weer wit te wees soos sneeu. Die selfde woord vir die rooi tou in die hebreeus word gebruik in Jesaja 1:18 as "skarlakenrooi."
Hierdie is 'n proses - 'n lewendige proses waar God elke dag saam met my en jou wandel maar ons moet in Hom glo - toe laat dat die Heilige Gees ons lewe verander - soos die lewe van Ragab verander is omdat sy geglo het in die God van Israel. Die geloof in haar aksie wat die rooi tou by die venster uitgehang het sodat sy en haar familie gered sou word.
Hoe lyk jou geloof tans in die verbonds God?
Hoe gehoorsaam is jy tans aan die Here?
Hoe lyk jou verhouding met Jesus?
Mag jy opnuut besef dat Jesus 'n pad met elkeen van ons wil stap - Hy ontmoet ons, nes ons is en los ons nooit nes ons is nie...
Dit verg 'n lewe van geloof. Om te glo dat ons verhouding met Jesus ons red en roep tot 'n lewe van geloof.
Dit vra ook dat ons, ons lewe aan niks anders as die verbonds God sal koppel. Soos ons groei in geloof raak hierdie koppeling aan die rooi tou al hoe sterkter.
Want hoe minder ons uit ons self leef en meer uit ons verhouding met Jesus, hoe meer reflekteer ons Jesus!
Wat is die kern lesse wat jy leer uit die storie van Ragab?
'n Vrou wat 'n prostituut was- wat totaal en al verander is deur die genade van die Here. Wie opgeneem is in die bloedlyn van Jesus Christus.
God gebruik mense soos Ragab, ek en jy wat bereid is om ons lewe te verander onderleiding van die Heilige Gees.
Bid saam
Ons kyk hierdie maand na van die geloofshelde waarvan ons lees in Hebreërs 11.
Hierdie week kyk ons na Josef.
Josef is ń ongelooflike karakter in die Ou Testament, en sy storie is baie bekend.
Gaan lees gerus Genesis 37 - 45.
Josef se storie leer vir ons as kinders van God 2 baie belangrike lesse.
1 – Hy het nooit sy vertroue in God laat gaan nie. Josef het God se perspektief…
Waar staan ek en jy in ons geloof in Jesus?
Laat ons toe dat ons situasie bepaal hoe ons vir Jesus beleef of sien? Of weet ons dat Hy getrou bly in alle omstandighede?
Genesis 50:15 Na hulle pa se dood het Josef se broers gevra: “En as Josef nog steeds 'n grief teen ons het en ons nou gaan terugbetaal vir al die kwaad wat ons hom aangedoen het?” 16Daarom het hulle 'n boodskap na hom toe gestuur: “Voor sy dood het u vader beveel: 17‘Julle moet vir Josef vra om tog die groot misdaad teen hom, die onreg wat julle hom aangedoen het, te vergewe.’ Vergeef ons tog nou die misdaad. Ons dien ook die God van u vader.” Josef het gehuil oor wat hulle vir hom laat weet het. 18Daarna het die broers na Josef toe gegaan en voor hom op hulle knieë geval en gesê: “Hier is ons voor u. Ons is u slawe.” 19Maar Josef het hulle geantwoord: “Moenie bang wees nie. Ek is nie God nie. 20Julle wou my kwaad aandoen, maar God wou daarmee goed doen: Hy het gesorg dat 'n groot volk nou in die lewe gebly het. 21Moenie bang wees nie. Ek sal sorg dat julle en julle kinders kos het.” Josef het hulle jammer gekry en hulle gerusgestel.
Glo jy dat God die beste vir jou beplan?
Miskien gaan jy nou deur ń moeilike tyd en jy sukkel om te sien hoe daar iets goeds uit jou omstandighede kan kom.
Dit is juis in tye van beproewing wanneer jy verby die huidige stand van sake moet kyk en op God moet vertrou en glo dat Hy besig is om Sy wil in jou lewe te laat geskiet.
Om soos Josef God se perspektief te kan hê, moet ons glo wat die apostel Paulus gesê het: “Ons weet dat God alles ten goede laat saamwerk vir hulle wat Hom liefhet, hulle wat geroep is volgens Sy doel vir hulle lewe” (Romeine 8:28).
Dit maak nie saak wat gebeur nie, hou aan om volkome op God te vertrou. Glo dat Hy alles ten goede laat meewerk en dat dit Sy Naam sal verheerlik.
2 – Hoe kan ek ooit so ń slegte ding doen? Ek sal mos teen God oortree. (Genesis 39:9)
Daar het baie slegte dinge met Josef in sy lewe gebeur, maar nie een keer draai hy sy rug op God nie.Toe Pótifar se vrou hom wou verlei, het hy letterlik weg gehardloop. Josef was ń man van uitstekende karakter en integriteit.
Hoe lyk jou hart?
Blameer jy vir God wanneer jy teenspoed beleef?
Draai jy maklik jou rug op God en op Sy gebooie in Sy Woord?
Probeer jy dalk verkeerde dade regverdig wanneer jy in die versoeking kom?
MOENIE toelaat dat probleme jou onder kry nie…
Jesus sê vir Sy dissipels net voor Sy kruisiging: “Ek sê hierdie dinge vir julle sodat julle in My rus en vrede kan vind. In die wêreld sal julle swaarkry beleef, maar skep moed: Ek het die wêreld reeds oorwin.” (Johannes 16:33).
God het nooit vir Josef in die steek gelaat nie, en Hy sal jou ook nie in die steek laat nie. Jy hoef nie sonde en versoekings alleen te trotseer nie. Onthou, Jesus het dit reeds vir jou moontlik gemaak om oorwinning te behaal. Versoekings en geleenthede om te sondig, gaan altyd volop wees, maar jy kan dit alles oorwin, want Jesus het reeds die oorwinning vir jou en my behaal.
Bid Saam
Website Developed and Hosted by